सिलगढी,
जल तथा मौसम विज्ञान विभागका अनुसार देशभरको मौसम क्रमशः सुधार हुँदै गएको छ । विभागको मौसम पूर्वानुमान महाशाखाका अनुसार शनिबार बिहान धेरै स्थानमा हल्कादेखि मध्यम वर्षा भए पनि दिउँसोपछि बिस्तारै खुल्दै गएको र साँझसम्म अधिकांश क्षेत्रमा वर्षा रोकिएको छ।

महाशाखाका मौसमविद् सञ्जीव अधिकारीका अनुसार बङ्गालको खाडीमा विकसित मोन्था चक्रवातको प्रभाव समाप्त भए पनि नेपालमा अझै पश्चिमी वायु र अरब सागरको न्यून चापीय प्रणालीको असर कायम रहँदा आज पनि केही ठाउँमा वर्षा भएको हो। तर, यो अवस्था विस्तारै सुधार हुँदै गएको र आइतबार आजको तुलनामा अझै खुलेको मौसम रहने अपेक्षा गरिएको छ।

हाल कोशी, मधेस, बागमती र गण्डकी प्रदेशमा सामान्यदेखि अधिकांश स्थानमा बदली छ भने बाँकी प्रदेशमा आंशिक बदलीको स्थिति रहेको विभागले जनाएको छ। कोशी, बागमती र गण्डकीका पहाडी तथा हिमाली भूभागका केही स्थानमा हल्कादेखि मध्यम वर्षा र हिमपातको सम्भावना पनि रहेको छ।

महाशाखाले यी क्षेत्रका जनजीवन, कृषि, पर्यटन र पर्वतारोहण गतिविधिमा असर पर्न सक्ने भन्दै सावधानी अपनाउन आग्रह गरेको छ।

यस वर्ष मोन्था चक्रवातसँगै अरब सागरको प्रणाली र पश्चिमी वायुको संयुक्त प्रभावका कारण देशका धेरै ठाउँमा अविरल वर्षा हुँदा धानबालीमा ठूलो क्षति पुगेको छ । यस्तै, हिमाली क्षेत्रमा परेको भारी हिमपातका कारण पदयात्रा र स्थानीय आवागमन प्रभावित भएको छ।

नेपालमा निरन्तर वर्षा कात्तिक १३ गतेदेखि सुरु भएको हो, जसको असर अहिले क्रमशः घट्दै गएको विभागले जनाएको छ।